Onde naceu a luz, onde o mar se espella nos vidros que miran á Mariña dende as galerías e a cor é toda branca. A cidade nobre, aberta, señorial e ben trazada que nos asombra en cada paso. Mariñeira e burguesa, elegantemente deitada sobre o mar. A Coruña é o exemplo perfecto do que os gregos quixeron definir como polis, a esencia do que é unha cidade. Pasear devagariño pola Coruña, dende a Mariña á Torre de Hércules, é facer do ocio un exercicio de intelixencia emocionada.