No ano 2017, o fillo de Andrés Gaos Berea púxose en contacto co Grupo Organistrum da Universidade de Santiago de Compostela coa finalidade de doar o fondo do seu pai. O seu desexo, despois de toda unha vida dedicada a conservar, investigar e difundir o músico galego, era que todo ese valioso arquivo descansase na súa terra natal. Cumpríase con iso, grazas á mediación imprescindible de Joám Trillo, coa vella aspiración de trasladar a Galicia o Fondo Gaos que, constituído por dous violíns, partituras, cartas, fotos, discos, etc., completan a primeira doazón, realizada en 1995 polo fillo ao Concello da Coruña. Para a Universidade de Santiago de Compostela supuxo toda unha honra ser os depositarios pero, tamén, unha grandísima responsabilidade. Como eixo central deste Ano Gaos 2019 decidiuse organizar unha exposición que funcionase como vertebradora de todas as actividades. Este libro reúne o catálogo da exposición e un conxunto de traballos que actualizan a dimensión da obra de Gaos.