«L tiu José António pon la sue zgrácia ne ls sous bersos, berdadeiro scultor de delores, cun ua abertua i la fuorça dua mundiada apuis de abierta ua presa cerrada por muitos anhos, que todo lhieba i lhaba alantre. Dun modo que parece que staba a spera de l fazer na lhéngua que siempre fui la sue, i sinte-se que la fuorça del ye la fuorça de la lhéngua, tamien eilha delorida i cun grandes deficuldades. Ye referindo-se a las deficuldades de la lhéngua que el bózia nun de ls sous poemas, «parai-me yá esse antierro...». Para alhá de la sue special marca de bida, la poesie de tiu José António stá chena dua risa que a todos nistante mos agarra cun sou eirotismo, que ye ua nobidade na poesie mirandesa screbida, mas que stá bien al son de l pobo mirandés i que mos faç dezir: este tiu Jantonho ye un berdadeiro fadista. Este lhado de la sue poesie dá-le ua frescura que mos deixa zarmados i, muita beç, mos pon a pensar noutros poetas populares. Outros cumo el houbo i hai pula tierra de Miranda i eiqui quédan bien repersentados. Un outro tema de la poesie de tiu Jantonho ten a ber cula sue tierra i la sue lhéngua, temas siempre persentes an todos ls poetas mirandeses. Nien podie ser de outro modo: cumo puode crecer ua arble sien le assentar bien las raízes an tierra buona?» Amadeu Ferreira Director da Colecção An Mirandés José António Esteves naciu a 12 de Márcio de 1947, an Palaçoulo, cunceilho de Miranda de l Douro. Eiqui fizo la 4ª classe i bibiu até als 21 nhos, trabalhando ne l campo cun sous pais i quatro armanos. Apuis la tropa, eimigrou pa la França, Almanha i Spanha, mas cedo torna i stablece-se cumo pequeinho andustrial de custrucion cebil an Bumioso. La treijédia bate-le a la puorta quando, un die apuis l nacimiento de sue filha mais nuoba (tenie yá dous filhos)...