Euskaltzaindia, HIZTEGI BATUAren lehen itzulia 2000. urteko martxoaren 31n bukatu zuenetik, etengabe ari da hura aberasten eta zorrozten, bigarren itzulian. Sarean dago jada HIZTEGI BATUA, guztion eskura, nork zer jakin nahi duen egoki erraztuta. Orain eskaintzen dena paperezkoa da, aurrekoaren laguntzaile eta osagarri. 2008ko abenduan kaleratu zen 2. argitaraldiko Hiztegi Batuak 27.786 sarrera eta 4.165 azpisarrera zituen eta oraingo honek, berriz, 36.016 sarrera eta 6.052 azpisarrera, hau da, bi urtean %29,6 hazi da sarreratan eta %45,3 azpisarreratan. Horregatik erabaki da, hain zuzen, Hiztegi Batuaren 3. argitaraldi hau kaleratzea.