Erne! Ipuin honetan txoritxo gezurtero bat bizi da, lagunak ezin konta ahala saltsatan sartzea ikaragarri gustatzen zaiona.Istorio hau bi hizkuntzatan idatzia da berez: ndebeleraz eta ingelesez. Egilea, Msuswa P. Mabena, Hegoafrikako Ndebele naziokoa da. Hego-Ndebele edo amaNdebele nazioa XII. mendean sortu zen, eta gaur egun bi milioi lagunek osatzen dute. Denboraren joanean, amaNdebeletarrek aldaketa politiko, migrazio eta gerra ugari jasan dituzte, eta, azken bi mendeetan, haietako askok sorterritik ihes egin behar izan dute, boer kolono zurien, Britainiar Inperioaren eta apartheidaren ekintzen ondorioz. Tentsioak tentsio, amaNdebeletarrek ahaleginak eta bi egin dituzte beren hizkuntzari, tradizioei eta arteadierazpenei eusteko. Horma-artea da ezagunenetako bat. Emakumeak aritzen dira horretan, eta eraikin eta etxebizitzak dekoratzen dituzte patroi geometriko ezin deigarriagoak erabiliz. Kolono zurien kontrako gerretan, artistek mezuak ezkutatzen zituzten beren diseinuetan, etsaia ohartu gabe amaNdebeletarren sufrikarioen eta erresistentziaren berri emateko. Hori dela eta, Dale Blankenaar irudigileak amaNdebeletarren mundu grafikoa erabiltzea erabaki zuen Gezurren txoria irudikatzeko: amaNdebeletar artistek beren mezuak ezkutatzen zituzten bezala, hemen ere forma geometrikoek sekretuak sinbolizatzen dituzte.Album bikain hau, laster etxeetan ozen irakurtzeko gustokoen bilakatuko da, Gezurren txoriaren bihurrikeriak direla-eta.