Velaquí un libro simpático e singular que, malia dirixirse en primeiro lugar aos numerosos galegos que viven lonxe da súa terra natal, é un auténtico gozo para calquera lector. Prestando atención a múltiples aspectos xeográficos, antropolóxicos, históricos, literarios, gastronómicos, en suma, contemplando a cultura, o país e o pobo galegos, Vicente Almazán conseguiu redactar un texto que nos achega a nosa propia idiosincrasia. Con este Breviario o autor quere acompañar o galego ausente no seu coñecemento de Galicia e levarlle, asemade, un recordo vivo da terra que o viu nacer. Para os que están en Galicia o libro ofrece unhas reflexións que dan que pensar, sen deixar de lado o entretemento.