Gizakia denboraren igarotzeaz jabetu zenetik eta gizarte antolaketa konplexu bat eraiki zuenetik, beti izan du etorkizuna hobetzeko desio eta guraria. Utopien abiapuntua Thomas More-k ezarri zuen 1516an bere liburu ospetsuarekin. Ordutik, gizarte perfektuaren ametsek garapen berezia izan dute filosofian eta literaturan, eta askotan gizarte garaikidearen akatsak konpontzeko eredu bihurtu dira. XX. mendea iristean, aldiz, utopiek XIX. mendetik sumatzen zen alderantzizko azpigeneroari lekukoa eman zioten, distopiari. Yevgeny Zamyatinen, Aldous Huxleyren eta George Orwellen idatziek amesgaiztozko gizarteak erakutsi zizkiguten, eta, ustekabean, utopiak baino askoz hurbilago ziruditen errealitatetik.