Hemen biltzen diren testuak Egan aldizkarian agertu ziren 1954-1961 urte bitartean. Garai hartan Koldo Mitxelenak zinema kritika egiten zuen aldizkari hartan. Bertan azaltzen dira zinemari buruzko bere iritziak, baina ez hori bakarrik, prosa eder eredugarriz dotore adierazita daude orduko eta betiko gizarte gaiak, gure herrikoak eta kanpokoak, umorez batzuetan, ironia erabiliz, hunkitzerainoko sentimenduz bestetzuetan, haserre ere bai inoiz…         «Niri dagokidanez, ez da beharbada alferrik esana izango zinemazalea izan naizela beti, 'comme ce n’est pas permis', lehoi koxkor baten orro isilak barrengo ilunpetarik kanpoko argitara tximistak egiten bidali ninduenez gero, izu eta ikara».