Anton Abadia (1810-1897) geografoa, astronomoa, hizkuntzalaria, etnografoa eta beste hainbat alorretako aditua izan zen. Egia esan, Abadiak hain zuen jakin-min handia ezen diziplina gutxi egin zitzaion arrotz. Izan ere, usadio zaharreko jakintsua izan zen. Urrutikoa interesatu zitzaion, eta Niloko iturburuak aurkitzea izan zuen bizitzaren ardatz, baina hurbilekoa inolaz ere ahaztu gabe, horren lekuko da euskara sustatzeko egin zuen funtsezko lana. Denboraren poderioz, haren lorpen zientifikoek distira galdu dute, baina haren biografia harrigarria da, Hendaian eraikiarazi zuen jauregia bezain harrigarria. Egun ere hor dago jauregia, Kantauri itsasoari ez ezik, zeruari ere begira. Iñigo Sagarzazuk asmatu du jakintsua bere garaian aurkezten, eta, gainera, oso modu erakargarrian.