Hai quen pensa, como o homenaxeado neste libro, que somos un río breve, curto, feito de tempo material, escaso e parco, de auga esvaradía e lixeira.Mais o tempo séntese unhas veces eterno e outras semella que durase só un instante. Determina os momentos que vivimos e resulta unha constante inmutable nas nosas vidas, sobre todo cando do seu estudo se fixo oficio. Parece que o río, a auga e a vida pasen e só o tempo permanece, inmóbil, no presente. Mais o río, a auga e a vida tamén permanecen; seguen sendo río, auga e vida. O mesmo que o que está unido tamén se mantén, como dalgún xeito simbolizan as achegas dos vinte e nove investigadores e amigos de Jesús de Juana que participan neste volume de homenaxe á súa persoa.