Unha selección dos relatos clásicos dos irmáns Grimm, traducidos directamente ó galego e con ilustracións clásicas.

O gato con botas, Caparuchiña vermella, Polgariño, a Cincenta, os músicos de Bremen, Hänsel e Gretel, Raponcio e Branca de Neve chegaron ós nosos días, narrados de xeración en xeración e en múltiples versións. Os irmáns Grimm compilaron estes e outros contos para familias burguesas de hai dous séculos. Nesta edición seleccionamos 45 dos relatos, traducidos ó galego directamente dende a súa versión orixinal e acompañados de ilustracións clásicas.

Jacob (1785-1863) e Wilhelm (1786-1859) naceron en Hanau, preto de Frankfurt, no seo dunha familia burguesa. Estudaron Dereito na Universidade de Marburg, pero pronto comezaron os seus estudos filolóxicos, que os levarían a elaborar o primeiro gran dicionario do alemán estándar e a compilar e editar os contos populares e de fadas que hoxe coñecemos.